Esta fin de semana celebrarase a IX edición da Festa do viño de Vilaboa onde se poderán degustar os viños da IXP Ribeiras do Morrazo. O evento, que terá lugar na explanada de Riomaior, contará coa participación das cinco adegas que forman parte da IXP: Adega Reboraina (Redondela); Adega Ardán (Marín); Adega Mosteiro de Poio (Poio); Adega Videiras no Mar (Cangas) e Adega Os Areeiros (Vilaboa).
Entre as actividades da festa, destaca a celebración da terceira edición da Cata Profesional das adegas da IXP Ribeiras do Morrazo, na que un xurado conformado por cinco profesionais do sector e presidido por José Manuel Fernández Castro, do Servizo de Industrias, Calidade e Cadea Agroalimentaria de Medio Rural, será o encargado de evaluar a calidade dos viños.